Уапсени две лица на аеродромот во Ларнака со околу 35 килограми канабис скриени во куферите

Со околу 35 килограми канабис скриени во куферите, двајца патници пристигнале на аеродромот во градот Ларнака на Кипар, по што биле уапсени, јави дописничката на МИА од Атина.

Дрогата била откриена при контролата спроведена од припадници на Секторот за борба против дрога на кипарската полиција и царински службеници, а уапсени се две лица на возраст од 19 и 25 години.

Кипарскиот информативен портал „Филелефтерос“ повикувајќи се на свои извори пишува дека станува збор за лица со грчко потекло, кои од Барселона преку Минхен пристигнале во Ларнака.

Ова е втор ваков случај на Кипар, откако кон средината на септември било уапсено едно лице на аеродромот во Ларнака откако во неговиот куфер биле пронајдени речиси 27 килограми канабис.

Ван Нистелрој за останувањето во Манчестер: Ќе видиме што носи иднината

Ќе видиме што носи иднината кога ќе се чујам со Аморим.

Руд ван Нистелрој, кој е на клупата на Манчестер Јунајтед додека да дојде Рубен Аморим како менаџер, вели дека се уште не се слушнал со Португалецот.

Холанѓанецот истакна дека е фокусиран на задачите кои му претстојат.

-Ќе видиме што ќе биде со мене од сега па натаму, тешко е сега да се коментира, треба да разговараме. Во меѓувреме, најважни работи за клубот се секојдневните обврски, натпреварот од Лига Европа. Ги имаме шампионите на Грција кои доаѓаат на „Олд Трафорд“, втори се во првенството во моментов, така што сега чувствувам одговорност да завршам добра работа во наредните денови. Тоа е мојата работа, вели Ван Нистелрој.

Натпреварот меѓу Јунајтед и ПАОК е закажан за 21 часот, а „црвените ѓаволи“ трипати ремизираа во првите три кола.

Божиновска: Набавката на јаглен сега ќе биде транспарентна

Министерката за енергетика Сања Божиновска изјави дека во моментов има тендер за набавка на јаглен во ТЕЦ Осломеј и тоа го спроведува Електростопанство на Македонија. 

Како што рече, Министерството за енергетика ќе ги корегира политиките, а јаглен набавува АД ЕСМ кое е под Владата, и оти набавката сега ќе биде транспарентна.

-Јавниот повик е објавен и може да се види на веб-страницата, изјави Божиновска одговарајќи на новинарско прашање колкава набавка на јаглен се планира и од каде.

На прашањето како го коментира префрлувањето на една милијарда денари за компанија која со години врши ископ во РЕК Битола, а за која ВМРО-ДПМНЕ во неколку наврати укажувала дека е компанија инволвирана во криминални тендери, министерката одговори дека не се работи за нов туку за рамковен договор.

-Колку што сум запознаена, потпишан е рамковен договор, не е нов договор, и знам дека цените се намалени за 30 до 40 проценти од минатата година. Инаку, сето тоа си има ревизија, си има институции кои се занимаваат со тоа. Ние се фокусираме на претстојната грејна сезона и на зимата, рече Божиновска која денеска присуствуваше на доделувањето ваучери за набавка на инвертер клима-уреди во Скопје.

САД му испорачуваат на Израел дополнителни 12 ловци Ф-15

Соединетите Држави продолжуваат да испраќаат воени сили на Блискиот Исток пред очекуваниот ирански напад врз Израел, а локациите за следење летови покажуваат дека американските ловци Ф-15Е се на пат кон Јордан.

Како што објави порталот „Тајмс оф Израел“, најмалку 12 авиони се на пат кон Јордан, по што ќе се приклучат на веќе распоредените борбени авиони. Иранските лидери предупредија дека ќе возвратат на Израел со „одмазднички“ напад поради серијата израелски напади на 26 октомври, за кои Ерусалим вели дека ја уништиле иранската воздушна одбрана и капацитетите за балистички ракети.

Според последните извештаи, иранскиот напад би можел да следи веќе овој викенд, а проектилите би можеле да бидат лансирани од Ирак. Оваа недела, американскиот секретар за одбрана Лојд Остин нареди распоредување на неколку бомбардери Б-52 Стратофортрес.

Минатиот месец, САД го испратија својот систем „THAAD“ (Terminal High Altitude Area Defense) во Израел. Овој систем за противракетна одбрана е клучен дел од американскиот систем за противракетна одбрана.

притисни ентер