Свет

Конференцијата на екстремната десница во Европа продолжи откако вчера беше запрена

Меѓународната конференција на екстремно десничарски политичари и поддржувачи продолжи денеска во Брисел, откако организаторите поднесоа тужба против локалните власти кои го запреа настанот бидејќи може да претставува закана за јавниот ред.

На „Националната конзервативна конференција“ - средба на екстремните националисти и фундаменталистички христијани, се очекува денеска да зборува унгарскиот премиер Виктор Орбан, еден ден откако таму зборуваше Најџел Фараж - човекот за кој се верува дека има најголема заслуга за излегувањето на Велика Британија од ЕУ.

Францускиот екстремен десничар Ерик Земур се очекуваше вчера да ги критикува новите правила на ЕУ за мигрантите и азилот, но полицијата не му дозволи да учествува на настанот.

Градоначалникот на местото каде се одржуваше средбата, по неколку часа и наредил на полицијата да не дозволува повеќе луѓе да влегуваат во салата, но настанот продолжил за оние што биле внатре. Тој рече дека овие мерки ги презедел откако антифашистичка група се закани дека ќе го прекине состанокот.

Сепак, судија во Брисел го суспендираше спроведувањето на наредбата на градоначалникот откако организаторите поднесоа тужба против локалната власт. Белгиските и британските лидери претходно изразија загриженост поради забраната.

„Автономијата на општинските власти е камен-темелник на нашата демократија, но таа никогаш не може да го надмине белгискиот устав, кој ја гарантира слободата на говор и мирно собирање од 1830 година. Забраната на политички состаноци е неуставна. Точка“, напиша во објава на Икс белгискиот премиер Александар де Кро, кој е либерал и противник на екстремната десница.

Портпаролката на британскиот премиер Риши Сунак ја нарече забраната „екстремно вознемирувачка“. /МИА

Свет

Нов инцидент меѓу Кина и Филипините во Јужното Кинеско Море

Филипините денеска ја обвинија кинеската крајбрежна стража за употреба на водени топови против два филипински брода и блокирање на пристап до спорниот гребен во Јужното Кинеско Море, а Пекинг потврди дека „одбил“ чамци од островот.

- Кинеската крајбрежна стража повторно постави пловечка бариера од 380 метри, со што го ограничи пристапот до областа на гребенот Скарборо, се вели во соопштението на филипинската крајбрежна стража.

Кина постави слична пловечка бариера на таа локација во септември 2023 година, која беше демонтирана неколку дена подоцна од страна на филипинската крајбрежна стража.

- На 30 април кинеската крајбрежна стража, во согласност со законот, одби филипински бродови кои влегоа во водите кај островот Хуангјан, се вели во соопштението на кинеските власти.

Гребенот Скарборо се наоѓа на 240 километри западно од главниот филипински остров Лузон и речиси 900 километри од кинескиот остров Хаинан, јужно од брегот на Кина, која полага право на речиси целото Јужно Кинеско Море.

Свет

Украина: Околу 30 мажи загинаа од почетокот на војната во обид да ја напуштат земјата

Портпаролот на украинската гранична служба Андриј Демченко изјави дека околу 30 мажи од Украина загинале од почетокот на војната со Русија во февруари 2022 година, обидувајќи се илегално да ја преминат границата и да избегнат учество во војната.

„Некои ги загубија животите додека се обидуваа да преминат планински реки или стрмни планини. Вкупно, од почетокот на инвазијата, околу 30 луѓе загинаа обидувајќи се илегално да ја преминат границата“, изјави Демченко.

Тој наведе дека од почетокот на војната досега биле откриени околу 450 криминални групи кои се обидувале да прошверцуваат луѓе преку граница и дека такви обиди се случуваат секој ден.

Свет

Студентите кои протестираа поради војната Израел и Хамас се судрија со полицијата во Тексас

Студентите кои протестираа поради војната меѓу Израел и Хамас се судрија со полицијата во Тексас.

Демонстрантите и полицијата синоќа се судрија во кампусот на Универзитетот во Тексас при што дојде до десетици апсења, а Универзитетот Колумбија во Њујорк почна да ги суспендира студентите, јавија странските агенции.

Според локалниот адвокат на Универзитетот во Остин, најмалку 40 демонстранти се уапсени синоќа под обвинение за нарушување на јавниот ред.

Доцна синоќа, Универзитетот објави соопштение во кое се вели дека многу од демонстрантите не се поврзани со институцијата и дека камповите се забранети во кампусот. Исто така, се наведува дека некои демонстранти влегле во „физички и вербални конфронтации“ со претставници на Универзитетот, што ги натерало службениците да контактираат со полицијата.

Протестот во Тексас и другите протести низ земјата уследија по протестите на Универзитетот Колумбија во Њујорк, кои се уште траат. Активистите во универзитетскиот кампус синоќа го пропуштија рокот да го напуштат кампот со околу 120 шатори.

Иако управата на Универзитетот не повика полиција да ги растера демонстрантите, портпаролот на Универзитетот Бен Чанг рече дека започнале процес за отпуштање на студентите. Тој рече дека иако Универзитетот го почитува правото на студентите на слободен говор, кампот ја попречува наставата и подготовката за завршните испити. Универзитетот соопшти дека ќе понуди алтернативно место за протести по испитите.