Македонија

Николоски: Прилеп секоја година од владата ќе добива околу 8 милиони евра

Прилеп секоја година од владата ќе добива околу 8 милиони евра со кои ќе се решат многу инфраструктурните проекти во општината.

Денеска сме тука заедно со прилепчани на еден исклучително убав хепенинг кој ретко се гледа во цела држава и навистина сакам да честитам на општината и на сите кои го организираат.

Се наоѓаме на Могилата на непобедените, многу симболично место, место кое актуелната власт на заминување на СДСМ и ДУИ би сакала да го заборави, да го избрише затоа што го потпишаа срамниот француски предлог со кој ја бришат македонската историја и македонската култура и засебност. Но, ова не може да се избрише и жртвите кои паднале за слобода во Втората светска војна секако не можат да се избришат.

Во следниот период очекуваме уште поголема мобилизација и уште поголема победа на вториот круг на претседателски избори и на парламентарните избори на 8 мај.

Очекуваме најмногу гласови за ВМРО-ДПМНЕ во изборната единица 4 и најмногу пратеници кои ќе овозможат стабилна влада, влада во која нема да бидат дел ни еден од двата партнери во актуелната влада, ни СДСМ ни ДУИ со цел да можеме да ги реализираме проектите кои ги ветуваме, а за Прилеп се бројни.

Во делот на инфраструктурата ветуваме завршување во трите фази на експресниот пат Прилеп-Градско до крај на 2026 година, понатаму до крај на мандатот изградба на обиколница околу Прилеп, изградба на автопатско решение Прилеп-Битола граница со Грција. Планираме заживување на железничката пруга помеѓу Прилеп и Битола да се спојат практично двата града преку една брза линија, а понатаму да има редовна линија и помеѓу Прилеп, Битола и Солун со целосна реконструкција на железничката линија. Секако тука е и поддршката за решавање на инфраструктурните проекти во рамки на општината преку средствата кои ќе ги добива општина Прилеп секоја година и кои ќе бидат околу 8 милиони евра годишно. Тука се проектите за пензионерите, зголемување на пензијата за околу 5 илјади денари уште во првата година. Проектите за најмладите каде ќе има директен поврат на средства за родено прво дете некаде околу 30 до 40 илјади денари, за родено второ дете и до 100 илјади денари и за родено трето дете поврат на персонален данок додека детето не наполни 18 години што значи уште една плата да влегува во семејствата. Тука е и проектот купи или изгради куќа каде до половина од трошоците ќе ги покрива државата. И бројни други проекти за што ни е потребна стабилна влада, влада која ќе го штити македонскиот национален интерес, ќе ја враќа македонската национална гордост, ќе воведува функционална правна држава и ќе се бори силно со организираниот криминал и корупција.

Александар Николоски, носител на изборна единица 4

Центар за комуникации на ВМРО-ДПМНЕ

Здравје

Нови шестмина хоспитализирани, вкупно 553 случаи на пертусис до 9 мај

Нови 15 случаи на пертусис - народски кажано голема кашлица, се пријавени во периодот од 3 до 9 мај, од кои шест лица се хоспитализирани.

Во однос на географската дистрибуција, најголем дел од случаите се пријавени во рамките на епидемијата во Скопје - 14, а пријавен е и еден случај од Крива Паланка. Возраста на заболените се движи од еден месец до 62 години, а најголем број случаи се од возрасната група до четири години, информираат од Институтот за јавно здравје (ИЈЗ) во најновиот извештај, објавен денеска.

Заклучно со 9 мај, во државава се регистрирани вкупно 553 случаи на голема кашлица, со инциденца од 30,1/100 000 жители. Тоа претставува неколкукратно зголемување на бројот на заболени во однос на изминатиот петгодишен период - од 2019 до 2023 година, кога се регистрирани вкупно 10 случаи.

Од ИЈЗ потсетуваат дека во тек се две епидемии, пријавени во ниво на територија на Скопје и Куманово.

Од 18 јануари до 9 мај, дадени се вкупно 45.715 дози вакцина што содржи компонента против голема кашлица. /МИА

Живот

Во Вински музеј Кавадарци 13 илјади посетители за три ипол години

Отворивме и две винотеки, во кои може да се купат вината од семејните винарии, како значаен потенцијал за лозаровинарството и винскиот туризам, нагласи Честоева.

Вкупно 13 илјади посетители го имаат посетено Вински музеј Кавадарци за повеќе од три ипол години, соопшти денеска директорката Весела Честоева, информирајќи дека вчера, музејските експонати имале можност да ги видат и посетители од познатиот вински регион Алзас од Франција.

- Вински музеј за регион Тиквеш од Кавадарци, станува се поинтересна дестинација за туристите. Од ден на ден расте интересот за овој музеј, за настаните што ги организираме овде и за експонатите што говорат за историјата, културата и традицијата во најголемиот лозаровинарски регион во државата. Гостите се запознаваат со богатата традиција во делот на винската култура во Тиквешијата. Развојот на туризмот и воспоставување на соработка со други туристички дестинации, како винската област во Франција, е приоритет на Општина Кавадарци, подвлече Честоева.

Таа нагласи дека оваа културна институција е секогаш отворена за најразлични настани за различни генерации, што ги промовираат уметноста, историјата, културата и традицијата на овој простор.

- Отворивме и две винотеки, во кои може да се купат вината од семејните винарии, како значаен потенцијал за лозаровинарството и винскиот туризам, нагласи Честоева.

Таа додаде дека нивните настани вклучуваат лица од различни генерации, а им посветуваат внимание на сите видови на уметност.

- Наша цел е да го издигнеме на повисоко ниво македонското вино на светската винска карта, а винскиот музеј да биде задолжителна дестинација на вљубениците во убавото вино, што исто така претставува своевидна уметност, додаде Честоева. /МИА

Свет

Сунак ги повика избирачите „да му веруваат“ пред парламентарните избори

Британскиот премиер Риши Сунак денеска ги повика избирачите „да му веруваат“ дека ќе ја обезбеди нивната безбедност во денешниот свет, кој станува сè поопасен.

Премиерот ги наведе своите заслуги во предизборниот говор во кој, според агенциите, „немал скрупули“, по повод претстојните, иако се уште не закажани, национални парламентарни избори годинава.

Со оглед на тоа што неговите колеги ториевци заостануваа зад опозициската Лабуристичка партија во анкетите пред изборите, Сунак го искористи својот говор на настанот во Аналитичкиот центар за размена на политики на Конзервативната партија за да ги убеди гласачите дека само тој е способен да ја заштити земјата од „оската на авторитарните држави“.

Сунак ги нападна лабуристите дека не се во состојба (ако дојдат на власт) да го исполнат ветеното зголемување на трошоците за одбрана (на 2,5 отсто од БДП годишно до 2030 година) или да ја спречат илегалната имиграција, и дека само тој има „јасен план“ за иднината . Лидерот на лабуристите Кир Стармер ги отфрли тврдењата како неосновани.

„Следните избори во нашата земја се националните избори и изборот на нив е јасен - иднината или минатото“, рече Сунак на настанот.

„Имаме јасна претстава за тоа што носи иднината - најопасните времиња што сме ги виделе во многу години, но и најпроменливите и само ние сме оние и само јас сум тој со храбрите идеи и јасен план кои ќе донесат сигурна иднина на нашата држава“, рече Сунак.

Лабуристите одговорија со обвинување на конзервативците.

„Единствениот начин да се запре овој хаос е да се сврти нова страница, а почетокот на промените е промена на власта“, рече Пит Мекфејден, национален координатор на кампањата на лабуристите. /МИА