Српската власт и опозиција не постигнаа договор за изборните услови, до петок одлука за учество

Претседателката на Собранието на Србија, Ана Брнабиќ денеска изјави дека не е постигнат договор меѓу власта и опозицијата за изборните услови, бидејќи се било сведено на дискусии за датуми за изборите.

Во Собранието на Србија заврши средбата на која претставниците на власта и опозицијата разговараа за изборните услови, по што претседателката на Собранието Ана Брнабиќ изјави дека не е постигнат договор за изборни услови, додека коалицијата Србија против насилство најави дека во петок ќе донесе одлука за учество или бојкот на изборите во Белград на 2 јуни, јави дописникот на МИА од Белград.

Претседателката на Собранието на Србија, Ана Брнабиќ денеска изјави дека не е постигнат договор меѓу власта и опозицијата за изборните услови, бидејќи се било сведено на дискусии за датуми за изборите.

- Разговаравме малку повеќе за изборните услови, но на крајот ултимативно беше поставен како услов датумот. Не избирачкиот список, не условите за избори, рече таа на прес-конференцијата по разговорите со дел од опозицијата.

Што се однесува до изборите во Белград, Брнабиќ рече дека тие ќе се одржат кога им е законски рок, на 2 јуни.

-Во однос на конструктивноста, размената на аргументи и мислења, оваа средба е апсолутно најдобрата досега. Имавме многу добра средба и дијалог што ќе го направи горд секој парламент во светот, изјави таа.

По денешните неуспешни консултации коалицијата Србија против насилство во петок ќе донесе одлука дали ќе излезе или ќе ги бојкотира изборите во Белград на 2 јуни, најави шефот на пратеничката група на Партијата за слобода и правда (ССП) , Мариника Тепиќ.

Таа на прес-конференцијата по разговорите рече дека и денеска не мрднале подалеку од почетокот и дека сите останале на своите позиции.

Шефот на пратеничката група на Србија Центар, Здравко Понош, оцени дека нема повеќе време значително да се променат изборните услови.

-Власта одлучи да оди на избори во Белград со нас или без нас. Сакаат да зборуваме за изборни услови за некои други избори, но ние не сме подготвени за тоа, рече Понош. /МИА

Тејлор Свифт нема да се појави на престижната Мет Гала, позната е причината

Тејлор Свифт не доаѓа на Мет Гала, која се одржува на 6 мај, потврдија за магазинот People.

И покрај информациите дека ќе биде на Мет Гала, поп-ѕвездата сака да се фокусира на својата претстојна европска турнеја. Нејзиниот фокус се пробите и подготовките за турнејата, која започнува на 9 мај во Париз, а потоа се шири во остатокот од Европа во текот на пролетта и летото.

Свифт веќе шест пати присуствувала на престижниот моден настан.

Овој месец Тејлор го издаде албумот Tortured Poets Department, кој веднаш стана апсолутен хит. Нејзиниот албум доби милијарда слушања на Spotify за само една недела.

За потсетување, зад Мет Гала стои Ана Винтур, долгогодишната уредничка на американскиот магазин Вог. Секоја година бројни познати личности се собираат и шетаат на црвениот тепих на музејот Метрополитен во Њујорк, а фокусот секогаш е на нивните креации.

Ковачевски: Условувања не прифаќаме СДСМ е државничка партија со силни корени

СДСМ не прифаќа никакви условувања и со никого нема да прави политички дилови, особено не со некого кој веќе се продал на нашиот политички противник .

СДСМ не прифаќа никакви условувања и со никого нема да прави политички дилови, особено не со некого кој веќе се продал на нашиот политички противник и мора да пишува писма за да го оправда своето шурување и своето коалицирање со нашиот политички противник. Овде се работи за прашање на иднината на државата и со неа нема тргување. Фокусирани сме да постигнеме најдобриот резултат на престојните избори на 8-ми мај и повикуваме на мобилизација на сите демократски и прогресивни сили за да се спречи враќањето на режимот на ВМРО-ДПМНЕ, порача претседателот на СДСМ Димитар Ковачевски од митингот на СДСМ и Коалицијата за европска иднина во Аеродром.

Ковачевски нагласи дека ова е прашање на иднината на државата и со неа нема тргување.

СДСМ е најголемата и единствената автентична социјал-демократска партија во Македонија. За разлика од субјектите како ЗНАМ, кои се човек - партија, СДСМ е државничка партија со длабоки и силни корени. Нас не водат социјал-демократските вредности, борбата за граѓаните и европската иднина на Македонија. Не се откажуваме од тоа, СДСМ е цврста и силна партија. Ќе продолжиме да се бориме за овие вредности, рече Ковачевски.

Претседателот Ковачевски нагласи дека СДСМ е модерна, прогресивна партија и единствена политичка сила која може да ја однесе Македонија во Европската Унија.

Ние не се откажуваме од Македонија во ЕУ! Верувајте, тоа не е цел сама за себе! Не се откажуваме од ЕУ затоа што знаеме дека тоа ќе обезбеди повисок животен стандард, поефикасна борба против криминалот и корупцијата, подобро образование и здравство, порача претседателот на СДСМ Димитар Ковачевски од митингот на СДСМ и Коалицијата за европска иднина во Аеродром, се наведува во партиското соопштение.

САД планираат да воведат забрана за увоз на збогатен ураниум од Русија

Администрацијата на американскиот претседател Џозеф Бајден има намера да воведе забрана за увоз на збогатен ураниум од Русија, користејќи ги извршните овластувања на шефот на Белата куќа.

Администрацијата на американскиот претседател Џозеф Бајден има намера да воведе забрана за увоз на збогатен ураниум од Русија, користејќи ги извршните овластувања на шефот на Белата куќа, откако дојде до ќорсокак во усвојувањето на овој закон во американскиот Конгрес.

Како што објави Блумберг, законот за забрана за увоз на збогатен ураниум од Русија беше усвоен во Претставничкиот дом на САД во декември.

Сепак, тогаш дојде до ќорсокак во Сенатот, каде демократите имаат мнозинство. Белата куќа сака забраната да биде усвоена како дел од воведувањето санкции кон Русија поради нејзината инвазија на Украина. Советот за национална безбедност и претставниците на Министерството за енергетика разговараа за забраната што ќе вклучува откажување од дозволата за увоз на гориво до 2028 година.

Извршната наредба на претседателот Бајден има речиси иста моќ како федералниот закон. Конгресот не може директно да го поништи, но може да донесе нов закон со кој ќе се поништи наредбата на претседателот. Американската агенција пренесува дека сè уште не е донесена конечна одлука за ова прашање, истакнувајќи дека администрацијата на Бајден и нуклеарната индустрија би сакале ова прашање да се реши на ниво на Конгресот.

Русија е најголемиот американски странски снабдувач со збогатен ураниум, обезбедувајќи речиси 25 отсто од горивото што се користи во американските реактори. Официјалните статистички податоци покажуваат дека САД минатата година увезле руски ураниум во вредност од 1,2 милијарди долари, што е најмногу регистрирано досега, со годишната вредност на пратките на ураниум зголемена за 43 отсто.

Белата куќа го гледа развојот на домашните капацитети за збогатување ураниум како прашање на националната безбедност. Претходно оваа година, Конгресот одобри 2,7 милијарди долари за таа цел, а администрацијата на Бајден повика на долгорочна забрана за увоз од Русија.

САД имаат свои наоѓалишта на ураниум, но тие не се доволни за снабдување на нуклеарниот енергетски сектор во земјата. Во меѓувреме, Русија е дом на најголемиот светски комплекс за збогатување ураниум, кој сочинува речиси половина од глобалниот капацитет.

притисни ентер