Живот

Во Шпанија луѓето живеат во просек 84 години

 Очекуваниот просечен животен век во Шпанија е 84 години. Поради тоа, оваа средоземноморска земја важи за дом на најдолговечната нација меѓу 27-те земји на Европската унија.

Научниците сметаат дека тоа се должи на медитеранската исхрана, богата со овошје, зеленчук, риба и маслиново масло... Но, и поради бројните сончеви денови и пријатната клима, благодарение на кои жителите минуваат повеќе време надвор и во физички активности.

На второ и трето место се Италија, каде што луѓето живеат во просек 83,8 години и Малта со очекуван животен век од 83,6 години. Просекот на Европската унија е 81,5 години.

- Во средоземноморските земји го цениме и социјалниот живот, па затоа излегуваме почесто од луѓето во нордиските земји, кои нè надминуваат во однос на БДП по глава на жител, вели Мануел Ангвита, претседател на шпанската Асоцијација на кардиолози.

Старосната граница е најниска во Полска, Словачка, Литванија, Унгарија, Романија и Латвија, а на дното е Бугарија, каде што животот во просек трае 75,8 години. Стручњаците сметаат дека на повисоката старосна граница на Шпанците влијае и тоа што пијат помалку алкохол, солидните здравствени услуги, тоа што со десетлетија не биле во војна и политиката на намалување на бројот на сообраќајни несреќи.

Македонија

Македонско-српски лингвистички средби

„Македонско-српски лингвистички средби“ ќе се одржуваат денеска и утре во Институтот за македонски јазик „Крсте Мисирков“ во Скопје. 

Орагнизатори на средбите се Институтот за македонски јазик „Крсте Мисирков“ во соработка со Институтот за српски јазик при САНУ.

Според програмата, денеска ќе бидат презентирани проектите: „Етимолошки речник на македонскиот јазик“, претставен од проф. д-р Гоце Цветановски; „Речник на црковнословенскиот јазик од македонска редакција“, претставен од проф. д-р Лилјана Макаријоска и „Јавниот дискурс во Република Србија“, претставен од проф. д-р Марина Николиќ и м-р Миљана Чопа.

За иницијативата за соработка меѓу проектите ќе зборува проф. д-р Марина Спасојевиќ.

Како што е најавено, утре предавање ќе одржи проф. д-р Софија Милорадовиќ, директорка на Институтот за српски јазик при САНУ.

Свет

Иранската влада свика итен состанок по смртта на Раиси

Иранската влада за денеска свика итен состанок по смртта на иранскиот претседател Ебрахим Раиси и министерот за надворешни работи на земјата Хосеин Амир Абдолахиан во хеликоптерска несреќа, јави иранската државна новинска агенција ИРНА.

Според фотографијата што ја објави агенцијата, столицата на која обично седи Раиси е празна и покриена со црна лента во спомен на претседателот.

Иранските државни медиуми емитуваат исламска молитва меѓу извештаите за смртта на Раиси и уште осум други лица откако хеликоптерот со кој патуваа се урна во иранската провинција Источен Азербејџан.

На профилот на Раиси на Х се објавени стихови од Куранот.

„Мир со Ебрахим. Навистина, така ги наградуваме оние што прават добро. Тој беше еден од нашите верни слуги“, се вели во стиховите од Куранот на профилот на Раиси.

Раиси беше втората најмоќна фигура во политичката структура на Иран по врховниот лидер ајатолахот Али Хамнеи.

Свет

Во Мексико девет лица загинаа во два напада врз кандидати за локалните избори

Девет лица загинаа во два напада врз кандидати на локалните избори на 2 јуни во Чиапас, јужно Мексико, соопшти синоќа обвинителството во тој регион познат по организираниот криминал.

Еден од двајцата кандидати е повреден во нападите што се случија ноќта меѓу саботата и неделата, се наведува во соопштението.

Чиапас веќе неколку дена е цел на напади врз кандидатите за општинските избори.

Од септември, најмалку 28 кандидати за локална функција се убиени низ Мексико, според најновите податоци на невладината организација Дата Сивика.

Насилството ги погодува сите партии и владејачката левичарска Морена, како и опозициските партии и коалиции.

Нарко картелите и организираните криминални банди сакаат да „наметнат кандидати“ на изборите, изјави неодамна локалниот обвинител.

Според него, начинот на работа е речиси ист. „Криминалците избираат кандидат и им даваат до знаење на другите дека немаат право да се кандидираат“, рече тој.

На 2 јуни, Мексико се подготвува да ги одржи најголемите избори во својата историја - претседателски, парламентарни, регионални и локални.

притисни ентер