Македонија

Разочараност во СДСМ по изборните резултати, паднаа и првите оставки

Разочарување и незадоволство од изборните резултати владееше на Бихаќка. Во седиштето на СДСМ тишина, која повремено ја нарушуваше џагорот од медиумските екипи, кои на моменти беа најбројни во салата. 

Надвор, малкумина поддржувачи, членови и симпатизери ги чекаа резултатите од двојните избори.

На СДСМ му е зададен тежок удар... Емотивно, лидерот на СДСМ Димитар Ковачевски го призна тешкиот изборен пораз. Тага и емоции беа видливи на лицата и на неговите партиски колеги и коалициски партнери. Сепак, Ковачевски не спомена оставка, но најави длабоки кадровски промени и избор на нов претседател.

-СДСМ ќе треба добро да погледне навнатре да размили што направивме и кои се резулатите и слабостите во последните 4 години, можеби и во последните 7 години. И уште поважно, што е тоа што треба да направи за да ја обновиме и вратиме довербата на граѓаните што ја изгубивме. Процесот на обнова мора да е на сите нивоа, затоа повикувам на нови внатрешни избори на сите партиски тела и на централно и на локално ниво. Почнувајќи од претседателот, раководството, па до претседателите на општинските организации и сите органи и тела на партијата, изјави Ковачевски.

Но, дел од партиските функционери не го чекаа отчетниот Конгрес и ги најавија своите оставки. Повлекување од потпретседателите места објавија Фатмир Битиќи и Перо Костадинов. Битиќи побара неговиот пример да го следи и целото раководство, од првиот до последниот.

Половина час пред прес-конференцијата на Ковачевски на Бихаќка, Стево Пендаровски се обрати од друг изборен штаб во хотелот „Александар Палас“. Им ја честиташе победата на ВМРО-ДПМНЕ и на неговата противкандидатка Сиљановска. Одговорност за изборните резултати лоцира и кај СДСМ и Коалицијата, но најголемо разочарување, како што рече, бил организираниот бојкот на вториот круг од ДУИ, но и од албанската опозиција.

-Не сум сигурен дали совеста им е мирна на оние кои со теснопартиски или лични интереси денеска ефективно спречија илјадници наши граѓани да го земат второто ливче и да гласаат и на претседателските избори. Стотици илјади наши граѓани беа оневозможувани на плански, на систематски, на организиран начин да земат второ ливче. Убеден сум дека оние 330.000 гласови кои отпаднаа во првиот круг се поблиску до мојот концепт отколку до концептот на противкандидатката. Од за мене непознати причини, направија таква калкулација, ги попречија луѓето да гласаат. Со тие претпоставени многу над стотици илјади гласови трката ќе беше далеку понеизвесна – рече Пендаровски.

СДСМ на вчерашните парламентарни избори го доживеа најтешкиот пораз од независноста. По седум години власт стана третопласирана политичка сила, зад ДУИ. Освоените 153 илјади гласови се убедливо најслаб резултат за СДСМ, за разлика од 2002-та кога освоија безмалку половина милион гласови. До вчера, најслабиот резултат беше во 2006 година, на чело со тогашниот премиер Владо Бучковски со освоени 218.463 гласови.

Македонија

Националниот ден на Власите - 23 Мај, неработен за припадници на влашката заедница

Министерството за труд и социјална политика, воедно, на граѓаните припадници на влашката заедница во Република Македонија им го честита Националниот ден на Власите. 

Министерството за труд и социјална политика соопшти дека 23 мај 2024 година (четврток), Националниот ден на Власите, е неработен ден за граѓаните припадници на влашката заедница во Република Македонија согласно со Законот за празниците на РМ („Службен весник на РМ“ бр.21/98 и 18/07).

Министерството за труд и социјална политика, воедно, на граѓаните припадници на влашката заедница во Република Македонија им го честита Националниот ден на Власите.

Македонија

Наградени најдобрите студенти на УКИМ за учебната 2022/2023 година

Во аулата на Ректоратот на УКИМ, денеска беа доделени награди на најдобро дипломирани студенти за учебната 2022/2023 година, а во рамки на свеченостите по повод патрониот ден и одбележување 75 години од постоење на Универзитетот. 

На редовни студенти од завршниот семестар во прв циклус студии кои покажале особени резултати во студиите, им беше врачена наградата „26 јули“ од Фондацијата „Франк Манинг“ од Велика Британија.

Наградите ги врачи ректорката на УКИМ, професор доктор Биљана Ангелова, а од Александар Стамболиев беше доделена наградата од Фондацијата „Стамболиев“.

Најдобриот студент на Медицинскиот факултет, Леонид Рене Томас Караџинов во изјава за МИА рече дека планот му е да остане во нашата држава.

- Одлуката ја темелам врз тоа што генерално целото семејство и поддршка ми се тука, не гледам причина да одам во странство. Во моментов цврсто сум убеден дека тука ќе ги барам моите почетоци за кариерата. Понатаму, ништо не е исклучено за во иднина. Но, се надевам дека тука ќе останам и понатаму за да придонесувам во здравството и во развој на целата здравствена грижа, изјави тој за МИА.

Една од наградените, Ана Софеска пред присутните рече дека времето што го поминале овде ги опремило со знаење, вештини и со самодоверба за да дадат значаен придонес во нашата татковина.

- Им честитам на моите колеги и знам дека иднината ќе биде светла, затоа што секој од нас ќе продолжи силно да блеска во своите полиња, кажа Софеска, која се обрати во име на сите добитници.

Награда за најдобро дипломиран студент добија Ангела Мешкова, Матеа Ташковска, Дејан Радуловски, Деспина Буцевска, Руфија Идризовска, Ана Софеска, Леонид Рене Томас Караџинов, Благоја Атанасоски, Виктор Мегленовски, Кристина Стоилковска, Габриела Козарова, Теодора Мазнева, Виктор Игнов, Марко Милчевски, Ања Митиќ, Марија Митевска, Ања Филипова, Теа Костадинова, Акса Зулбеари, Егзона Муртезани, Мергим Фера, Јана Панчевска, Ева Зовиќ, Иван Станишковски и Дамјан Наумовски.

Добитници на наградата „26 јули“ се Давид Стојаноски, Дејан Радуловски, Ана Софеска, Габриела Козарова, Кристина Стоилковска, Ања Филипова и Ева Зовиќ.

Наградата од Фондацијата „Стамболиев“ му припадна на Виктор Игнов.

Покрај наградените и членови на нивните семејства, на свеченоста присуствуваа и проректорите на Универзитетот, генералниот секретар, претседателот на Универзитетскиот сенат, деканите на факултетите.

На настанот беше кажано дека Универзитетот „Свети Кирил и Методиј“ во Скопје и понатаму ќе биде отворен за сите идни достигнувања на студентите.

Свет

Позната причината за хеликоптерската несреќа на Ебрахим Раиси?

Причина за тешкото слетување на хеликоптерот во кој се наоѓаше иранскиот претседател Ебрахим Раиси се лошите временски услови, изјави иранскиот амбасадор во Белорусија, Саид Јари. 

Иранскиот амбасадор во Минск изјави дека специјалната комисија ќе ги утврди точните причини за падот на хеликоптерот на претседателот Раиси и ќе ги проучи временските и техничките услови. Покрај Раиси и иранскиот министер за надворешни работи Хосеин Амир Абдолахиан, идентификувани се уште три лица кои загинаа во хеликоптерска несреќа во северозападен Иран, објави денеска иранската државна новинска агенција ИРНА.

Во хеликоптерската несреќа живото го загубила и имамот во градот Табриз, ајатолахот Мохамад Али Ал-е Хашем, началникот на иранската провинција Источен Азербејџан, генерал Малек Рахмати и командантот на единицата за заштита на претседателот, Сардар Сејед Мехди Мусави. Загинаа и одреден број телохранители и екипаж на хеликоптер кои се уште не се идентификувани.

притисни ентер