Македонија

Убавина од природа близу Тиквешко Езеро

Прекрасна природа и студена изворска вода ни посакаа добредојде во кавадаречкото село Драдња, во близина на Тиквешкото Езеро.

МИА деновиве фотографираше прекрасни камени градби изградени во минатото, полни со животни приказни и тајни. Во нив некогаш со многу љубов се делеле семејните тага и радост. Се запрашавме, што е тоа толку мистериозно убаво во нив, та, зрачат од убавина, дури и кога кровот се урива, а прозорците се искршени или едвам се држат. Дрвјата околу нив, само ја збогатуваат таа волшебна селска идила.

За жал, магичните дрвени чардаци како од приказните, беа празни, никој не уживаше во нивната убавина. Немаше кој да ги одмара очите загледувајќи се во пространите зелени килими од тревата збогатена со утринска роса. Да ти е жал да згазнеш, да не ја растуриш магијата создадена од раката на мајката природа.

До многу од куќите едвам се стигнува поради грмушки, оти таму со години не стапнала човечка нога.

Сета оваа убавина е распослана на околу седум километри од Тиквешко Езеро, доколку се движите по земјениот шумски пат. Многу побрзо ќе стигнете до езерската шир, ако одлучите како нас, да пропешачите низ тој дел на Тиквешијата и од ридот се спуштите право кон езерото. Патем, можете да другарувате со дрвјата, птиците, инсектите.

Море од лозја по патот

Прошетката до Драдња, па до Тиквешко Езеро, ја започнавме со пешачење од селото Дреново, заедно со планинарите на планинарското спортско друштво „Орле" од Кавадарци. Нашата камера ги регистрираше лозовите насади по патот, од кои се прават извонредни вина и ракии, маџун и други производи од грозје, по што е препознатлив овој крај.

- Располагаме со волшебна природна убавина, која заслужува да биде видена од светот. Но, за тоа е неопходно да се уреди патот до селото што е одамна иселено и да се создадат услови за развој на селскиот туризам. Држави со развиен туризам ги препознаваат ваквите потенцијали и ги негуваат и заработуваат од нив. Неопходно е и кај нас да се преземат активности за промоција на оваа, би рекол рајска убавина, ни рече 57 годишниот Зоран Михов, единствениот човек што го сретнавме во селото, додека одмаравме крај изворската вода, од која не престанувавме да пиеме.

Тој ни раскажа дека оваа селска средина некогаш броела и до осумдесетина куќи полни со живот. Луѓето се замимавале со земјоделство и сточарство. Најмногу се иселиле во шеесетите години од минатиот век, кога била изградена браната на езерото. Луѓето заминале за да работат, главно во фабрики. Самиот бил роден во Кавадарци, но бидејќи татко му потекнувал одовде, Драдња била отсекогаш дел од неговиот живот, од најмали нозе, до ден денешен.

- Кај и да одам, тука постојано се враќам, крај семејното огниште. До пред некоја година имаше по некој од постарите постојани жители, изумреа и сега никој веќе не живее тука преку целата година. Во пет куќи повремено доаѓаме неколкумина, поради лозарството, морето од лозја што ги имаме во овој крај. Сепак, ми се чини дека најмногу доаѓаме поради чистиот воздух. Низ годините работев во фабрика со прашина и доаѓањето тука ми доаѓа како лек, како мелем на рана, коментираше тој.

Златомани доаѓаат по скриени богатства

Михов, кој одгледува и пчели во Драдња, ни откри дека во селото доаѓаат блиски на оние што некогаш се иселиле, за да видат кај им се корените, но и љубители на природата, авантуристи, да побегнат од градскиот асфалт, за да уживаат и да ги наполнат батериите, што се вели.

- Горе на ридот е околу 800 метри надморска височина, тука долу, околу 500 метри. Искрено да кажам, доаѓаат и златомани, трагачи по злато, по закопано богатство од дамнешни времиња. Ги бркаме, ама не бива, трчаат наоколу со детектори, со најразлични апарати. Најмногу трагачи има во месноста „Забот", таму горе на ритчето. Им викаме, уште еднаш да не ги видиме тука, ама не се разбираат. Бараат и раскажуваат како имале најдено пари на други места, идат со бесни џипови, ни раскажа тој.

Михов ни објасни дека си ја реновирал куќата во селото.

- Можев да изградам куќа во викенд населба крај езерото, поблиску до езерската вода, но тука ми е некако помирно, природата е понедопрена. Ме влече ова место, ова парче земја, повторно и повторно да доаѓам. Струја има, а вода полниме од селската чешма. Природна студена изворска вода, ако наполниш, го поти шишето, толку е ладна, додаде тој.

Драдња е околу 24 километри оддалечено од Кавадарци. До браната на езерото води асфалтиран пат.

- Останатите седум километри се поминуваат по земјен, шумски пат. Се оди со патничко моторно возило, лека кола, што би се рекло, ама подобро е ако се доаѓа со малку потеренски возила. Бараме да се уреди овој пат за развој на селски туризам, рече нашиот соговорник.

Тој сподели со нас дека низ годините, жителите од ова село важеле за добри мајстори, занаетчии. Којзнае, можеби токму поради тоа камените градби му пркосат на времето и ја задржале својата убавина, дури и кога полека, полека се уриваат. /МИА

Свет

Русите тврдат дека влегле во Вовчанск, Украина негира, но оцени дека „ситуацијата е тешка“

Русија тврди дека нејзините сили влегле во градот Вовчанск во североисточниот дел на границата, во близина на вториот по големина град во Украина, Харков.

Украина потврди дека Русија денеска ги интензивирала копнените операции кон Харков, напаѓајќи нови области со мали оперативни, борбени групи за да го прошири фронтот и да ги истроши украинските сили, но не и дека руските војници влегле во Вовчанск.

Гувернерот на Харковската област Олех Сињехубов оцени дека „ситуацијата е тешка“.

Според него, од петокот руските војници влегуваат во Украина во близина на Харков, отворајќи нов североисточен фронт во војната која се води главно на исток и југ речиси две години.

„Непријателот се обидува намерно да ја истегне линијата на фронтот, напаѓајќи во мали групи, но во нови насоки. Ситуацијата е тешка“, изјави гувернерот Сињехубов. /МИА

Свет

Четворица нови полски министри положија заклетва

Четворица нови министри денеска положија заклетва пред полскиот претседател Анджеј Дуда. Четворицата министри кои ги напуштаат функциите ќе бидат кандидати на изборите за Европскиот парламент.

Поранешната директорка на Националната уметничка галерија во Варшава „Зачета“ – Хана Врубљевска доаѓа на местото на министерот за култура Бартломеи Шенкевич.

На местото на Марчин Кервински министер за внатрешни работи доаѓа координаторот на разузнавачките служби, Томаш Шемониак, кој сега ќе ги комбинира двете места.

Јакуб Јаворовски ќе биде нов министер за државен имот, на местото на Борис Будка.

Министерствата за култура, внатрешни работи и државни средства се предводени од членови на партијата Граѓанска платформа на Туск.

Четвртиот министер – Кшиштоф Хетман, член на христијанско-конзервативната партија Трет пат, ќе биде заменет како министер за економски развој и технологија со Кшиштоф Пашик, кој моментално е лидер на парламентарната група на партијата.

Изборите за ЕП ќе се одржат од 6 до 9 јуни. /MИА

Свет

Правда: Словаците ги ценат придобивките од ЕУ, но не се грижат за европските избори и за Брисел

Словаците, пишува весникот, ги сакаат придобивките од ЕУ, но претставничките тела на ЕУ ги доживуваат како „злобниот Брисел“ кој им наредува.

Словаците ги ценат предностите на Европската унија, но изборите за Европскиот парламент не ги интересираат многу, а покрај кампањите, сличен тренд е забележлив кај сите членки на Европската унија и се заканува опасност да се зголеми силата на маргиналните партии и евроскептиците во ЕП, пишува словачкиот весник Правда.

„Иако членството во ЕУ овде (во Словачка) се гледа како нешто што се зема здраво за готово, а на политичката сцена никој, освен некои маргинални гласови, не го доведува во прашање, жителите на Словачка едвај обрнуваат внимание на изборите за претставничкото тело на ниво на ЕУ“, пишува весникот.

Во исто време, според Правда, овие избори премногу го поларизираа општеството, а слабиот одѕив се заканува дека партиите кои не победиле на национално ниво или се маргинални ќе влезат во Европскиот парламент, создавајќи „опасност од зголемување на евроскептичните гласови во ЕП“.

Весникот оценува дека Словаците можеби донекаде го научиле тоа, бидејќи излезноста на европските избори во таа земја во 2014 година била само 13,05 отсто, што е најниска во ЕУ на тие избори, додека во 2019 година сепак се искачи на 22,74 отсто.

Но, слаб е интересот и во ЕУ, пишува Правда, а на првите избори за ЕП во 1979 година излезноста беше речиси 62 отсто, а во 2019 година 50,95 отсто.

Словаците, пишува весникот, ги сакаат придобивките од ЕУ, но претставничките тела на ЕУ ги доживуваат како „злобниот Брисел“ кој им наредува.

„Далеку од тоа дека одлуките на ЕП се секогаш совршени, но во наши раце е да влијаеме. Дури и нашите претставници, во наша полза, ќе можат да кренат раце за или против мерките на Брисел“, пишува весникот.

Сепак, пишува Правда, „Словаците, едноставно кажано, немаат доверба во Брисел“.

„Словаците сè уште се само Европејци на хартија, но не и во нивните срца и умови“, наведува Правда. /МИА